ఢిల్లీలో ఇప్పటి వరకు జరిగిన పేలుళ్లు ఇవే..

దేశ రాజధాని బాంబు పేలుళ్లతో వణికి పోతోంది.. గత రెండు దశాబ్దాలుగా సుమారు 20కి పైగా పేలుళ్లు జరిగాయి.. ఈ పేలుళ్లలో ఎంతో మంది ప్రాణాలు కోల్పోయారు.. సుమారు రెండు వేల మందికి పైగా క్షతగాత్రులయి.. శాశ్వత వికలాంగులుగా మారారు... ఉగ్రవాదులు అమర్చే బాంబు పేలుళ్లలో సామాన్యులే సమిధలవుతున్నారు.. ఇప్పటి వరకు ఢిల్లీలో జరిగిన బాంబ్ పేలుళ్ల పై స్పెషల్ స్టోరీ.
దేశ రాజధాని ఢిల్లీ.. దేశ రాజకీయాలన్నీ ఇక్కడే కేంద్రీకృతమయి ఉంటాయి.. అందుకే ఉగ్రవాదుల కళ్లన్నీ రాజధాని పైనే.. ఏదో ఒక రకంగా ప్రభుత్వానికి హెచ్చరికలు పంపాలంటే ఎక్కడో ఒక చోట బాంబులు పెట్టి ఉగ్రవాదులు తమ ఉనికిని చాటుకుంటారు. గత రెండు దశాబ్దాల కాలంలో ఢిల్లీ లో పేలిన బాంబుల చరిత్ర చూద్దాం..
1993 సంవత్సరం మార్చి 12 న జరిగిన పేలుళ్లలో 257 మంది చనిపోగా 1400 మంది గాయపడ్డారు..
1997లోనే.. 7 సార్లు పేలుళ్లు జరిగాయి..
1997 జనవరి 9న ఢిల్లీ పోలీస్ హెడ్ క్వార్టర్స్ ముందు జరిగిన పేలుళ్లలో50 మంది గాయాల పాలయ్యారు.
అక్టోబర్ 1న సర్దార్ బజార్ ప్రాంతంలో జరిగిన పేలుళ్లలో 30 మంది గాయపడ్డారు.
అక్టోబర్ 10 న శాంతి వనం, కౌరియాపూల్, కింగ్స్ వే క్యాంప్ లలో జరిగిన వరస పేలుళ్లలో ఒకరు చనిపోగా 16 మంది గాయపడ్డారు.
అక్టోబర్ 18న రాణీబాగ్ లో జరిగిన బాంబు పేలుళ్లలో ఒకరు ప్రాణాలు కోల్పోగా 23 మంది గాయపడ్డారు.
నవంబర్ 30న ఎర్రకోట వద్ద జరిగిన జంట పేలుళ్లలో ముగ్గురుచనిపోగా 70 మంది గాయపడ్డారు.
డిసెంబర్ 30న పంజాబీ బాగ్ వద్ద బస్సులో జరిగిన పేలుళ్లలో నలుగురు చనిపోగా 30 మంది గాయపడ్డారు.
ఆ తరువాత తిరిగి 1998లో జూలై 26న కాశ్మీర్ గేటు వద్ద నిలిపిన అంతర్జాతీయ బస్సులో జరిగిన పేలుడులో ఇద్దరు చనిపోగా ముగ్గురు గాయపడ్డారు
2000 సంవత్సరం జూన్ 18 న ఎర్రకోట వద్ద జరిగిన పేలుడులో ఎనిమిదేళ్ల బాలిక తో బాటు మరొకరు ప్రాణాలు కోల్పోగా... డజన్ మంది గాయపడ్డారు.
2001 అక్టోబర్ 1న జరిగిన పేలుళ్లలో 35 మంది చనిపోయారు..
మళ్లీ రెండు నెలల తరువాత పార్లమెంట్ పై జరిగిన దాడిలో ఐదుగురు గన్ మెన్ లతో సహా 12 మంది చనిపోయారు.
మే 14న ఆర్మీ క్యాంప్ పై ఉగ్రవాదులు జరిపిన పేలుళ్లలో పిల్లలు పెద్దలూ అంతా కలిపి సుమారు 30 మంది చనిపోయారు..
2005, మే 22 న రెండు సినిమా హాళ్లలో జరిగిన జంట పేలుళ్లలో ఒకరు ప్రాణాలు కోల్పోగా 60 మంది తీవ్రంగా గాయపడ్డారు
2005 సంవత్సరంలో అక్టోబర్ నెలలో దీపావళికి ముందు ఢిల్లీ మార్కెట్ లో జరిగిన పేలుళ్లలో 62 మంది చనిపోయారు.. వందల సంఖ్యలో గాయాల పాలయ్యారు.
2006 లో ఏప్రియల్ 14 న పాత ఢిల్లీలో జామా మసీద్ ప్రాంగణంలో జరిగిన పేలుళ్లలో 14 మంది తీవ్రంగా గాయపడ్డారు.
2008 సంవత్సరంలో సెప్టెంబర్ 13 న జరిగిన సీరియల‌్ బాంబు పేలుళ్లలో 25 మంది చనిపోగా 100మందికి పైగా తీవ్రంగా గాయపడ్డారు. మరో 14 రోజుల తరువాత మెహ్రౌలీ ఫ్లవర్ మార్కెట్ లో జరిగిన పేలుళ్లలో ఒకరు ప్రాణాలు కోల్పోగా 23 మంది గాయాలపాలయ్యారు. అదే నెలలో 27న మెహ్రాలీ మార్కెట్ లో జరిగిన పేలుళ్లలో ముగ్గురు చనిపోగా 21 మంది గాయపడ్డారు.
2011 మే 25 న హైకోర్టు పార్కింగ్ స్థలంలో పాలిథీన్ కవర్ లో బాంబ్ పెల్చారు. అయితే ఈ పేలుళ్లలో ప్రాణ నష్టం జరుగలేదు.
తాజాగా ఈ రోజు (సెప్టెంబర్ 7,2011) జరిగిన బాంబు పేలుళ్లో 9 మంది చనిపోగా 45 మందికి పైగా గాయపడ్డారు.
ఉగ్రవాదులు సృష్టించే మారణ హోమంలో సామాన్య మానవులే సమిధలవుతున్నారు... ఉగ్రవాదుల లక్ష్యాల కోసమో.. ఉనికి కోసమో సామాన్య పౌరులు ప్రాణాలు ఫణంగా పెట్టాల్సి వస్తోంది.




ీ