ఎవరీ గాలి సోదరులు..? గాలివాటం...

అక్రమ గనుల తవ్వకంలో అరెస్టయిన గాలి సోదరుల మైనింగ్ మాఫియా గా ఎలా ఎదిగారు.. అత్యంత సాధారణ కుటుంబంలో పుట్టిన గాలి సోదరులు కోట్లకు ఎలా పడగలెత్తారు... చిట్ ఫండ్ కంపెనీలు పెట్టి దివాళా తీసిన గాలి సోదరులు కర్నాటక రాజకీయాల్లో కింగ్‌మేకర్ లా ఎలా మారారు. తమను పొలిటికల్‌గా జన్మనిచ్చిన పార్టీ ఇబ్బంది పడే పరిస్థితులెందుకొచ్చాయి... ఇంతకీ గాలి సోదరుల పొలిటికల్ ప్రొఫైల్ పై హెచ్ ఎం టీవీ స్పెషల్ స్టోరీ.
గాలి సోదరులు... తక్కువ కాలంలో గల్లీ రాజకీయల నుంచి ఢిల్లీ రాజకీయలను శాసించే స్థాయికి ఎదిగిన నేతలు.. రెండు రాష్ట్రాల రాజకీయాలను శాసించే స్థాయికి చేరుకున్న గాలి బ్రదర్స్ ప్రస్థానంలో ఎన్నో మలుపులు.. వారికి ఈ లైమ్ లైట్ ఓవర్ నైట్ లో ఆయాచితంగా వచ్చింది కాదు..
సాధారణ కానిస్టేబుల్ కుటుంబం నుంచి పుట్టిన గాలిసోదరులు.. వీరిలో పెద్ద సోదరుడి పేరు గాలి కరుణాకర్, రెండవ వాడు జనార్దన్ రెడ్డి, ఆఖరు వాడు సోమశేఖరురెడ్డి. వీరు బతుకు దెరువు కోసం బళ్ళారి రోడ్ల పై తిరిగిన రోజులే ఎక్కువ.. టూ వీలర్ పై తిరుగుతూ బతుకుదెరువు కోసం వెతుకులాటలో ఎన్ని గడపలో ఎక్కి దిగారు... 1998లో లో ఎన్నోబుల్ సేవింగ్ అండ్ ఇన్వేస్ట్‌మెంట్ కంపెనీ ప్రైవేట్ లిమిటెడ్ స్థాపించి ఇబ్బందులు పడ్డారు. ఈ కంపెనీ పెట్టి 200 కోట్లకు మోసం చేశారన్న ఆరోపణలు రావడంతో మళ్లీ ఇబ్బందులెదుయ్యాయి.. 1999లో మైనింగ్ రంగంలో అడుగు పెట్టిన గాలి సోదరులకు కాస్త కలిసొచ్చే రోజులు వచ్చాయి. సరిగ్గా అదే సమయంలో.. బళ్లారిలో సోనియా గాంధీ తన ప్రాభవాన్ని చాటుకుంటున్న తరుణంలో ఎప్పటికపుడు సుష్మాస్వరాజ్ సోనియాకు చెక్ పెడుతూ వచ్చింది. సరిగ్గా అదే సమయంలో సుష్మా స్వరాజ్ దత్తపుత్రుడిగా పిలుచుకొనే శ్రీరాములు గాలి బ్రదర్స్ ను పొలిటికల్ స్క్రీన్ పైకి తెచ్సారు. సుష్మా స్వరాజ్ అండ దండలతో బిజేపీ పార్టీ పటిష్టతకు గాలి బ్రదర్స్ సర్వశక్తులు ఒడ్డారు. దీంతో కర్నాటక రాజకీయాల పై గట్టి పట్టు తెచ్చుకోగలిగారు..
కర్నాటక రాజకీయాల పై గాలి సోదరుల తొలి ప్రభావం బళ్లారి మున్సిపల్ కౌన్సిల్ ఎన్నికలతో ప్రారంభమయింది. ఈ ఎన్నికల్లో బిజేపీ ఘన విజయం సాధించింది. ఈ విజయం వెనుక గాలి సోదరుల ప్రభావాన్ని అధిష్టానం గుర్తించింది. ఆ తరువాత 2004 అసెంబ్లీ ఎన్నికల్లో గాలి సోదరుల ప్రభావం కనిపించింది.. బళ్లారి లోక్ సభ స్థానంలో 1952 నుంచి గెలుస్తూ వస్తున్న అభ్యర్థి పైగాలి కరుణాకర్ రెడ్డి గెలిచారు.. గాలి సోదరుల రాజకీయ వ్యూహాలతో కర్నాటకలో భారతీయ జనతా పార్టీకి కొత్త జీవం వచ్చింది. కర్నాటకలో జిల్లాల నుంచి గల్లీల వరకు గాలి ప్రభావం పాకింది.. రాజకీయంగా తమకంటూ బలమైన పునాదులు వేసుకున్నారు.
ఒకపక్క రాజకీయంగా ఎదుగుతూనే మరో పక్క అదే పలుకుబడిని ఉపయోగించుకొని వ్యాపార సామ్రాజ్యాన్ని విస్తరించ సాగారు.. అంతర్జాతీయంగా ఇనుప ఖనిజం ఎగుమతుల్లో గాలి సోదరులు తమ కంటూ ప్రత్యేక స్థానాన్ని పదిల పరుచుకున్నారు. ఓబుళాపురం మైనింగ్ అంతర్జాతీయ ఖ్యాతి సంపాదించింది.. ఇది బళ్లారి సరిహద్దుల నుంచి ఆంధ్రప్రదేశ్ లోని అనంతపురం జిల్లాలోకి కూడా చొచ్చుకొచ్చింది. ఈ కంపెనీకి శ్రీరాములు మేనేజింగ్ డైరక్టర్. చైనా తన ఇన్‌ఫ్రా స్టక్చర్ కోసం గాలి సోదరుల ఐరన్ ఓర్ కంపెనీతో ఒప్పందం కుదుర్చుకోవడంతో.. ఓబుళాపురం తవ్వకాలు ఊపందుకున్నాయి. లక్షల్లో ఉన్న వ్యాపారం వందల కోట్లకు చేరింది. మరోపక్క ఆంధ్రప్రదేశ్‌లో వైయస్ రాజశేఖర్ రెడ్డి ప్రభుత్వం గాలి బ్రదర్స్‌కు కావలసిన సహాయ సహకారాలు అందించడంతో రెండు రాష్ట్రాల్లో ఐరన్ ఓర్ వ్యాపార సామ్రాజ్యానికి ఎదురులేని నేతలుగా ఎదిగారు.. తమకంటూ సొంత హెలికాప్టర్ కొనుగోలు చేశారు. ఈ హెలికాప్టర్ తరచూ పార్టీ కార్యకలాపాలకు కూడా వాడేవారు.
గాలి సోదరుల మైనింగ్ పై అనేక ఆరోపణలు వచ్చాయి... అక్రమ మైనింగ్ తవ్వకాలు జరుపుతున్నారని రాజకీయ పార్టీలు దుమారం రేపాయి. మైనింగ్ వ్యాపారం నుంచి మైనింగ్ మాఫియాగా ఎదిగిన వ్యాపార సామ్రాట్టులను కదిలిస్తే రెండు రాష్ట్రాల రాజకీయ పునాదులే కదిలేలా పాతుకుపోయారు. కర్నాటకలో బిజేపీ పార్టీలో ఉంటూనే ఆంధ్రప్రదేశ్‌లో కాంగ్రెస్ పార్టీతో సన్నిహితంగా ఉండటం గాలి బ్రదర్స్ కే చెల్లింది.. పేద కుటుంబం నుంచి రాజకుటుంబం స్థాయికి ఎదిగిన బళ్లారి సోదరుల జీవతం బంగారు మయంగా మారింది.
గాలి అక్రమ గనుల వ్యవహారం వల్ల కర్నాటకలో ప్రభుత్వాలే ఒడిదుడుకుల్లో పడాల్సి వచ్చింది.. గాలి వ్యాపారం యడ్యూరప్ప పదవికి ఎసరు పెట్టింది. అక్రమాల పై వేసిన లోకాయుక్త కమిటీ గాలి వ్యవహారం పై పూర్తిస్థాయి వివరాలు సేకరించి తన నివేదికలో పొందుపరిచింది. లోకాయుక్త నివేదికలో ఆశ్చర్యకరమైన విషయాలు వెలుగు చూశాయి.
గాలి జనార్దన్ రెడ్డి బంగారం కుర్చీలోనే కూర్చుంటారు. దాని ఖరీదు 2.2 కోట్ల రూపాయలు. బంగారంతో తయారు చేసిన విగ్రహాలకు పూజలు చేస్తారు. వాటి విలువ రూ. 2.28 కోట్లు. రూ. 13.15 లక్షల విలువ చేసే బెల్టు ధరిస్తారు. గాలి జనార్దన్ రెడ్డి జీవితమంతా స్వర్ణమయమే. బంగారు పళ్లెంలోనే తింటారు. గిన్నెలు, చెంచా, ఫోర్కు, కత్తి అన్నీ బంగారంతో చేసిన వాటినే ఉపయోగిస్తారు.. వీటి విలువ లక్షల్లో ఉంటుందని అంచనా
సాదాసీదా జీవితం నుంచి వేల కోట్ల రూపాయలకు పడగలెత్తిన గాలి సోదరుల పై ఎన్నో సార్లు ఐటి దాడులు జరిగాయి.. తాజాగా సిబిఐ దాడితో గాలి వ్యాపార సామ్రాజ్య లోగుట్టు మరింత తెలిసే అవకాశం ఉంది..