వెంకట్ రెడ్డి చేసింది ఏ దీక్ష? ఆమరణ దీక్షా? అలకదీక్షా?

రాష్ట్రంలో తెలంగాణ నినాదం మొదలయినప్పటి నుంచి దీక్షా కాలం మొదలయింది. 2011 సంవత్సరానికి నిరాహార దీక్షల సంవత్సరం అనుకుంటే సరిపోతుందేమో.. ఈ ఏడాది కాలంలో ఎవరెన్ని దీక్షలు చేశారో లెక్కబెట్టడం కాస్త కష్టమే.. ఒక్క అన్నా హజారే దీక్షను మించి ఏ ఒక్కదీక్ష కూడా ఫలప్రదం కాలేదంటే నమ్మండి . అయినా అది జాతీయ వార్త. నేను ఆ వాతలు పెట్టుకోదలుచుకోలేదు. కానీ మన రాష్ట్రం విషయంలోకి వస్తే ఈ మధ్య కాలంలో చాలా మందే దీక్షా దక్షలు బయలుదేరారు. నాల్రోజులు దీక్ష చేసి లేవడం ఓ ఫ్యాషనైపోయింది. ఈ పార్టీ ఆ పార్టీ అనే భేదం లేకుండా అన్ని పార్టీలు దీక్షలు చేస్తున్నాయి. ఆఖరుకు కమ్యునిస్టు పార్టీ ఎమ్మెల్యే కూనంనేని సాంబశివరావు కూడా నిరాహార దీక్ష చేశాడు. ఇక ఎటొచ్చీ ఈ మద్య ఆమరణనిరాహార దీక్ష చేసిన వెంకటరెడ్డి దీక్షే మరీ చర్చనీయాంశంగా మారింది..
ఈ దీక్ష విధానం చూసిన వాళ్లు ఈ దీక్షలో నిబద్దత ఎంత అని ప్రశ్నిస్తున్నారు. ఇది నా ఒక్కడి అభిప్రాయమైతే.. నేను బ్లాగులో రాసేవాణ్నే కాదు. కానీ ఇది పదిమంది పదిరకాలుగా అనుకుంటున్న మాటలను ఒడిసి పట్టి మీకు అందిస్తున్నాను. మరో ముఖ్య విషయం ఏంటంటే. ఆమరణదీక్షకు దిగిన వారు లక్ష్యం సాధించడమా లేక మరణించడమా.. ఇదే వాళ్ల ఆశయం. అంటే ఆశయ సాధన కోసం ప్రాణాలను ఫణంగా పెట్టడం అన్నమాట. ఈ విషయంలో పొట్టి శ్రీరాములు అందరికీ ఆదర్శమనే చెప్పుకోవాలి. ఎందుకంటే లక్ష్యం నెరవేరే వరకు ముద్ద ముట్టలేదు. కానీ ఇప్పుడు దేశంలో రాష్ట్రంలో అడిగి అరెస్టు చేయించుకునే నాయకులకు కూడా కొదవలేదని జనం బహాటంగానే చెప్పుకుంటున్నారు. అయితే వెంకటరెడ్డి అలా అరెస్టయ్యాడని మాత్రం చెప్పలేను గానీ... ఆ దీక్షకు ఆమరణ దీక్ష అని పేరు పెట్టడమే బాగాలేదు. గతంలో తెలంగాణ అన్న విద్యార్ధులను.. గతమంటే ఎన్నో సంవత్సరాలు కాదు. కేవలం నెలల క్రితమే మీటింగుల్లో లాఠీలు విరిగిన వరకు కొట్టిచ్చిన కోమటి రెడ్డికి అమాంతంగా తెలంగాణ పై, తెలంగాణ బిడ్డల పై ప్రేమ పుట్టుకు రావడం అసహజమే.. కానీ పుట్టుకొచ్చింది. పుట్టుకొచ్చినా ఇప్పటికే పోరాడుతున్న పార్టీలను కాదని.. తనే సొంతంగా నల్లగొండలో దీక్ష చేయడం వెనుక మతలబు ఏంటి.. ఇంత చేసినా.. కాంగ్రెస్ ప్రభుత్వం చీమకుట్టనట్టు వ్యవహరించకపోవడం వెనుక అసలు రాజకీయం ఏమిటి.? కోమట రెడ్డి ఏ రాజకీయాల కోసం దీక్ష చేశాడో.. కిరణ్ కుమర్ రెడ్డి దాన్ని నిర్వీర్వం చేసేందుకు ఆయన జోలికి కూడా పోలేదు. కానీ పాపం ఆరోగ్య కారణాల రీత్యా.. అరెస్టులు.. ఫ్లూయిడ్‌లు.. దీక్ష విరమణలు.. ఆసుపత్రి నుంచి బయటకు రాగానే రెడ్డిగారు.. బస్సుయాత్ర చేసి ప్రాబల్యం సంతరించుకోబోతున్నారు. దీనికోసం హడావిడిగా ఆడియో సి.డిలు కూడా సిద్ధం చేసుకుంటున్నారట. ఇప్పటి వరకు తెలంగాణ వ్యతిరేకిగా ముద్రపడ్డ కోమటరెడ్డి ఇక తెలంగాణ కోసం ప్రాణత్యాగం చేయబోయిన ముద్దుబిడ్డ సానుభూతితో ప్రజల్లో బాగా ప్రచారం.. ఇటు టీఆర్ఎస్ నేతల హడావుడి అంతా ఇంతా కాదు.. కోమటరెడ్డి దీక్షకూర్చున్న మరుసటి రోజునుంచే మద్దతులు మొదలయ్యాయి. కానీ ఢిల్లీలో దీక్షకోసం కూర్చున్న కొండాలక్ష్మణ్ బాపూజీ న్యూస్ కవర్ కాదు... టీఆర్ఎస్ మద్దతు తెలుపదు. ఎందుకంటే బాపూజీ ఎమ్మెల్యే కాదు. ఆయనకు మద్దతిచ్చినా ఇవ్వకున్నా పార్టీకి వచ్చే లాభం కానీ నష్టం కానీ లేదు. పైగా సీమాంధ్రతో కుమ్మక్కయ్యాడనే అపవాదొకటి.. దీక్ష ద్వారా తెలంగాణ ప్రజలకేమోగానీ వెంకటరెడ్డికి మాత్రం పుష్కలంగా లాభం చేకూరిందనే చెప్పాలి. ఇటో కారో.. కమలమో సిద్ధంగా ఉన్నాయి. అదీ ఇదీ కాకుంటే జగన్ ఎలాగూ గురిపెట్టుకున్నాడు.. తెలంగాణ వాదాన్ని ఎంతమంది క్యాష్ చేసుకుంటారో.. కవులు, కళాకారులు, మేథావులు, మీడియా వీళ్లగురించి గంటలు గంటలు బుర్రలు బద్దలు కొట్టికొని విశ్లేషించండి.. పాటలు పాడండి.. వ్యాసాలు రాయండి.. ఈ చరిత్ర ..(ఇంకావుంది..to be contd)